Со два дена доцнење, „СпејсИкс“ на милијардерот Илон Маск успешно ја лансираше својата ракета „Супер Хеви-Старшип“, во она што беше прогласено за извонредно успешен тест лет по три последователни неуспеси претходно оваа година, објави „Си-Би-Ес њуз“.
Иако заштитната „облога“ околу горниот дел од моторот на „Старшип“ беше оштетена за време на повторното слетување, вселенското летало остана под контрола и успеа да слета во Индискиот Океан како што беше планирано.
„Потврдено слетување! Честитки до целиот тим на „СпејсИкс“ за возбудливиот десетти тест лет на „Старшип“, објави „СпејсИкс“ на X. Првата фаза на „Суперхеви“ се одвиваше како што беше планирано, а потоа се врати на брегот на Тексашкиот Залив за слетување.
Првиот обид за лансирање во неделата беше откажан поради технички проблеми, а вториот обид во понеделникот беше попречен од облачно време. За НАСА, пробните летови се клучни, бидејќи планира да користи модифицирана верзија на „Старшип“ за мисија за испраќање астронаути на Месечината во 2027 година.
Тоа значи дека „СпејсИкс“ ќе мора да направи многу летови со супертешки танкери за да ги наполни резервоарите на „Старшип“ со горивото потребно за лунарна мисија. Експертите велат дека слетувањето на ракета висока 16 ката на Месечината има предизвици, како што е ризикот од нерамен терен што би можел да предизвика нејзино превртување.