Во населбата Капиштец, вчера повторен вандализам од малолетни лица со непримерно однесување. Група малолетници кршеле шишиња, палеле петарди и предизвикувале тепачки, со што директно го загрозувале јавниот ред и мир и безбедноста на граѓаните, сподели синоќа градоначалникот на Центар, Горан Герасимовски.
„Ова не е изолиран инцидент, туку континуиран проблем кој бара итна реакција. Како одговорни граѓани, веќе поднесовме пријава до надлежните институции и апелираме до Министерството за внатрешни работи веднаш да преземе мерки за справување со овие недолични активности и да поведе детална истрага”, вели градоначалникот Герасимовски.
„Очекуваме брза и ефикасна реакција со цел да се спречи некоја поголема трагедија. Малолетниците кои се вклучени во вакви дејства, како што е вандализмот, често не се свесни за последиците од своето однесување. Ова не само што им наштетува на другите, туку можат да се повредат и тие самите“, истакна тој.