Компанијата Naran Automotive се појави на сцената во 2020 година, но брзо исчезна во заборав. Сепак, сè уште е „жива“ и има прототип на хиперавтомобил кој ќе биде јавно претставен овој месец.
Некои детали за „хипер купето“ беа објавени уште во јуни, а основачот на компанијата, Амеер Наран соработуваше со дизајнерот Џовин Вонг на дизајн инспириран од мотоспортот. Вонг претходно работеше на моделите De Tomaso P72 и Apollo Intesa Emozione.
Станува збор за купе со агресивен изглед, кој има отвори на хаубата, истакнат преден сплитер и препознатливи светла. Видливи се и спортски прагови на вратите, истакнати задни крила и бандажи од „хибриден карбон“, како и карбонски керамички сопирачки. Автомобилот доби композитни панели на каросеријата.
Сè уште нема фотографии од внатрешноста, но клиентите може да очекуваат премиум кожа и алуминиумски детали. Сепак, клиентите ќе можат да го прилагодат ентериерот и да избираат материјали според нивните желби.
Хиперавтомобилот е придвижуван од 5.0-литарски V8 твин-турбо мотор, кој развива 1.063 КС и 1.035 Nm вртежен момент, а е поврзан со „уникатен менувач“ и погон на четири тркала. Сепак, достапна е и опцијата за пренос на сила само на задните тркала.
Според информациите од компанијата, хиперавтомобилот од 0 до 100 km/h забрзува за околу 2,5 секунди, додека 322 km/h достигнува за 16,5 секунди. Исто така, производителот тврди дека моделот ќе стане најбрзиот неелектрифициран четирисед во светот.
Naran споменува и аеродинамичен пакет инспириран од „тркачки патеки“, кој ќе создаде 1.377 килограми потисок.
Производството ќе биде ограничено на 39 примероци, а основната цена е 2 милиони евра. Компанијата моментално добива депозити во износ од 350.000 евра.