Пред 26 години, на овој ден, во Куманово, Македонија, беше потпишан Воено-техничкиот договор, со што заврши 78-дневната војна меѓу НАТО и тогашната Сојузна Република Југославија, пишува „Косово онлајн“.
Одредбите од овој договор беа вклучени во Резолуцијата 1244 на Советот за безбедност на ООН, која беше усвоена еден ден подоцна, на 10 јуни.
Преговорите за прекин на војната започнаа во Белград на 3 јуни, кога тогашниот претседател на Сојузна Република Југославија, Слободан Милошевиќ, го прифати мировниот предлог на Марти Ахтисари и Виктор Черномирдин. Овој договор беше верификуван истиот ден од страна на српскиот Парламент, кој на вонредна седница го усвои Документот за постигнување мир, односно планот на САД, Европската Унија и Русија за пристигнување на меѓународни сили, под мандат на ООН, во Косово.
Овој документ потоа беше усвоен од тогашната Влада на Сојузна Република Југославија.
Преговорите за воените детали за прекин на војната започнаа на 6 јуни во селото Блаце, во крчмата „Европа 93“, но набрзо беа преместени на воениот аеродром во близина на Куманово.
Преговорите траеја вкупно пет дена, а Воено-техничкиот договор меѓу Меѓународните безбедносни сили (КФОР) и владите на тогашната СР Југославија и Србија го потпишаа генералот на Југословенската армија Светозар Марјановиќ, генералот на српското Министерство за внатрешни работи Обрад Стевановиќ и британскиот генерал Мајкл Џексон.
Договорот содржи вкупно шест члена – одредби, од кои најважен е „прекин на непријателствата“ меѓу НАТО и силите на СРЈ.
Врз основа на овој договор, беше договорено силите на СРЈ од Косово да се повлечат во фази, во рок од 11 дена, како и да се воспостави безбедносна зона.
Една од клучните обврски на КФОР беше разоружување на тогашната ОВК и обезбедување безбедност и сигурност за сите граѓани.
Дел од овој договор беше и клаузула за усвојување на резолуција од страна на Советот за безбедност на ООН.
Советот за безбедност на ОН гласаше за Резолуцијата 1244 еден ден подоцна, на 10 јуни, и таа е сè уште во сила и ја следат силите на КФОР, како и други меѓународни актери присутни на Косово.
Без оглед на обврската на КФОР да обезбеди безбедност, по повлекувањето на југословенските сили, се случија неконтролирани етнички напади, што резултираше со егзодус на околу 250.000 Срби од Косово.