Според проценките на израелските и американските разузнавачки служби пред израелскиот напад врз Иран, Техеран имал 2.000 балистички ракети, а најновите наоди сугерираат дека овој број е значително поголем.
Израелски разузнавачки извори потврдија за израелските медиуми дека капацитетите на Иран за производство на компоненти и склопување на балистички ракети се на повисоко технолошко ниво отколку што се сметаше претходно.
Врз основа на сите информации достапни од израелската војска, тие проценуваат дека Иран ќе има 6.000 ракети до 2026 година, до 8.800 ракети до август 2027 година, а со таа брзина, би достигнал приближно 10.000 балистички ракети до 2028 година.
Иран ја изгради својата индустриска база за производство на балистички ракети врз основа на сопственото знаење, но и со увоз на некои суровини од Кина и технологии од Северна Кореја.
Се проценува дека иранските компании можат да испорачаат до 50 балистички ракети со среден и краток дострел месечно, што во моментов претставува врв на индустриското производство на овој вид оружје на глобално ниво.
Израелската војска, исто така, тврди дека половина од транспортните лансери за балистички ракети се уништени, при што се наведува бројка од 200 лансери.
Покрај самите балистички ракети, транспортните лансери се од огромно значење бидејќи овозможуваат транспорт на ракети и нивно лансирање од различни точки, што не е случај со фиксните ракетни силоси и бази во западниот дел на Иран.