Косово е највозвишениот проект спроведен и заштитен со Уставот од 17 февруари, рече премиерот на Косово, Авдулах Хоти пред средбите со српскиот претседател Александар Вучиќ во Брисел и Вашингтон.
Хоти зборуваше во Собранието на Косово за средбите со Србија во Брисел и Вашингтон и за повторното воспоставување на дијалогот и рече дека доколку дијалогот меѓу Косово и Србија не ги донесе очекуваните резултати, ќе бидат преземени сите мерки за одржување на економијата.
„Косово од 17 февруари е највозвишен проект спроведен и заштитен со Уставот. Овде завршува секој обид за поткопување на субјективноста на нашата држава. Ова отвора перспектива за нормализирање на односите со соседните земји. Врз основа на оваа премиса, косовското собрание донесе резолуција владата да започне технички дијалог. Контекстот на тој дијалог беше изнаоѓање начин за нормализирање на односите меѓу Косово и Србија“, рече Хоти.
Како што изјави тој, Србија го продолжи дијалогот со цел да ги искористи своите капацитети за да му наштети на Косово и додаде дека данокот од 100 проценти воведен на српската стока го запре Косово во процесот на интеграција.
„Се наоѓаме во таа ситуација. Со анемичната волја на Брисел, американскиот фактор се согласи да биде креативен помошник во новиот мировен процес кој ќе кулминира со меѓусебното признавање. Косово има витален интерес за консолидирање на својата државност. Ние ќе инсистираме на градење консензус со Србија“, рече Хоти.
Новиот моментум на ЕУ и САД, според него, кој има за цел мировен проект со взаемно признавање, доаѓа во време кога одредени групи на популисти ги загрозуваат пријателствата.
Премиерот на Косово, исто така, истакна дека дијалогот треба да се сфати како можност за подобрување на Косово и нејзината државна субјективност.
„Убеден сум дека само на овој начин можеме да ја вратиме довербата на САД во косовската влада и да ги решиме недоразбирањата. Сите одлуки што ги донесовме во првите денови беа донесени така што граѓаните нема да плаќаат за погрешна политика во форма на политичка, економска и трговска изолација. Мораме да бидеме обединети и да се поддржуваме едни со други“, рече Хоти во косовското собрание, каде во моментов има полемики за укинување на реципроцитетот.
Доколку дијалогот не ги донесе очекуваните резултати, ние ќе ги преземеме сите мерки за одржување на економијата и субјективноста, заклучи Хоти.