Новоизбраниот американски претседател Џо Бајден се очекува да направи историски потег и да постави жена на чело на Пентагон, што ќе биде за прв пат, со што ќе се сруши една од ретките преостанати бариери за жените на власт.
Мишел Флерној (59), политички умерен ветеран во Пентагон, се смета за врвен кандидат за министер за одбрана.
За време на мандатот на Трамп, Пентагон имаше дури пет шефови, од кои последниот беше отпуштен во понеделникот, затоа што тој се спротивстави на намерата на Трамп да го забрза повлекувањето на американските војници од странство и да ја користи армијата за да ги задуши граѓанските протести во САД
Кој и да стане шеф на Пентагон, веднаш ќе се соочи со намалување на буџетот и учество на армијата во дистрибуцијата на вакцината за коронавирус.
Политиката на Демократската партија, чиј кандидат е Бајден, одамна е за поставување жени на клучни позиции во армијата, а Флерној беше и избор на Хилари Клинтон кога учествуваше на претходните претседателски избори во 2016 година.
Таа е за силна воена соработка во светот, на повеќенаврати работеше во Пентагон од 90-тите години на минатиот век, а во 2009-2012 година беше потсекретар одговорен за политички работи. Таа сега работи во бордот на директори на ИТ консултантската компанија „Booz Allen Hamilton“, која соработува со американскиот државен сектор за одбрана, што може да биде пречка за нејзиниот избор.
Таа во март изјави дека кој и да е следниот претседател – Трамп или Бајден, ќе мора да работи на промена на мислењето во светот дека „Америка повеќе не е сигурен партнер“, за што ќе треба многу трудољубивост.
Министерството за одбрана е една од само трите сојузни владини агенции – другите се министерства за финансии и воени ветерани, со кои никогаш не раководела жена. Некои од 28 секретари кои ја извршуваа највисоката функција во Пентагон од неговото создавање во 1947 година, беа воени ветерани, а Флерној не служела војска.
Флерној смета дека Кина е најзначајниот долгорочен предизвик за доминација на САД на светската сцена. Во јули таа рече дека Соединетите држави ја губат својата воено-технолошка предност во однос на клучните конкуренти како што е Кина и дека свртувањето на тој тренд мора да биде најголем приоритет на Пентагон.
Сепак, таа исто така предупреди на воено напуштање на Блискиот исток и наместо тоа се залагаше за „поскромно ниво на континуирано присуство“. Како пример, таа поддржа ограничена улога во Авганистан, која се фокусира повеќе на борбата против тероризмот, а помалку на обновата на таа земја.
Во врска со Северна Кореја, таа на октомврискиот форум за Интернет рече дека, иако нуклеарното разоружување треба да остане крајната цел, таа рече дека е тешко да се очекува Ким Јонг Ун да прифати да се откаже од својот нуклеарен арсенал, која таа го смета за „мапа за преживување“ на тамошниот режим.
Во однос на Иран, Флерној се залагаше за ревидиран пристап кон одвраќање на Исламската Република со кршење на познатиот модел на испраќање повеќе американски сили на Заливот како одговор на иранските провокации, што администрацијата на Трамп го стори во мај 2019 година
Флерној е коосновач на консултантската компанија „WestExec Advisors“, која ги советува компаниите и го анализира геополитичкиот ризик. Таа работи со мешавина на кадри, вклучително и поранешни високи владини службеници, вклучувајќи го и Ентони Блинкен, поранешен заменик државен секретар и сега главен советник за надворешна политика на Бајден и воени експерти како пензионираниот генерал на армијата Винсент Брукс, кој командуваше со американските сили во Кореја до 2019 година. Во 2007 година, Флерној помогна за формирање на аналитичкиот „Центар за нова американска безбедност“.