Рускиот министер за надворешни работи Сергеј Лавров во понеделникот изјави дека негодувањето изразено од западните земји во врска со апсењето на критичарот на Кремљ, Алексеј Навални има за цел да го сврти вниманието на нивните граѓани од проблемите во нивните земји.
– Очигледно, тоа им овозможува на западните политичари да мислат дека ваквите изјави можат да го одвлечат вниманието од длабоката криза во која се најде моделот на либерален развој – рече шефот на руската дипломатија.
Полицијата го уапси Навални откако слета на аеродромот во Москва во неделата вечерта, што е негово прво пристигнување на руско тло откако беше отруен минатото лето.
Западните земји денес ѝ наредија на Русија веднаш да го ослободи Навални. Русија брзо ги отфрли тие барања, велејќи им да се држат до нивните работи.