Возила и специјализирана опрема за спасување во зимски услови се набавени во рамки на Проектот: „Нови можности за безбеден зимски авантуристички туризам” финансиран од Европската Унија, преку ИПА2 Програмата за прекугранична соработка меѓу Северна Македонија и Албанија и министерството за локална самоуправа, а го спроведуваат Црвениот крст Охрид, општините Дебрца и Грамш како и Алпинистичкиот Клуб ПАТАГОНИЈА-Охрид.
– Проектот „Нови можности за безбеден зимски авантуристички туризам” има за цел промоција на социо-економскиот развој на охридско-преспанскиот прекуграничен регион преку одржлив развој на туризмот, со особено внимание за создавање деловни можности за урбаните и руралните области од поширокиот регион, како и понуда на различни туристички пакети и промоција на високи стандарди за безбедност во туризмот. Поконкретно, целта на проектот е да се прошири туристичката сезона преку цела година, како и да се обезбеди поизбалансиран и инклузивен развој на поширокиот прекуграничен регион околу Охридското Езеро со приближување на општините Дебрца и Грамш кон Охрид и Поградец, рече министерот за локална самоуправа, Горан Милевски.
Тој појасни дека имплементација на проектот започна на први ноември 2019 година и ќе се спроведува три години, а вкупниот буџет на проектот изнесува 692.000 евра, од кои 588.200 се грант од ЕУ, а останатите средства се обезбедени со кофинансирање од страна на споменатите партнери.
-Овој проект е продолжение на претходно исклучително успешно реализираниот проект „Регионот Охридско Езеро – Безбедна дестинација за авантуристички туризам”, со вкупен буџет од 415.000 Евра, со кој се воспоставија две спасителни служби: Служба за спасување на вода во Поградец, Р. Албанија и Служба за спасување на планина во Охрид. Исто така, беше набавена опрема за споменатите служби и се организираа обуки за спасување на вода во Поградец и за спасување на планина во Охрид. Се изгради и современ оперативен и тренинг центар за Планинската Спасителна Служба во Охрид, рече Милевски.
Претседателот на Црвен Крст Охрид изрази благодарност до Министерството за локална самоуправа и ЕУ, кажа дека клучот на ЕУ е во нивните членови на спасителската служба кои имаат храбри идеи и визии кои се мотивираат со секојдневни работни задачи.
– Сонот да имаме модерен оперативен центар со најсовремен во кој ќе работи и делува оперативното спасителната служба воспоставен ефикасен систем и стандарди за спасување на планина и непристапни терени се остварува. Клучот нивен е на европските врати, ги отвораат европските стандарди и вредности, затоа во иднина очекуваме општините целосно да соработуваат и да даваат поддршка за комплетна одржливост на Црвениот Крст, вели истакна Точков.
Амбасадорот на ЕУ, Дејвид Гир порача дека во рамки на досегашните активности на проектот обележана е прекугранична планинарска патека од планинарскиот дом во с. Брежани, општина Дебрца до општина Грамш); реконструирано е старото училиште во општина Дебрца и во тек е негова пренамена во планинарски дом, Авантуристички парк во близина на планинарскиот дом на Галичица како и пречистителна станица за планинарскиот дом. Исто така поставен е мониторинг систем за посетители во НП Галичица.
– Тука сме да ги поддржиме сите проекти кои се важни преку прекуграничната програма, токму преку овој проект има за цел Охрид да биде сигурна дестинација и да биде етаблиран како туристичка дестинација особено во планинскиот предел од двете страни. Затоа, Црвен Крст ја има клучната улога за да во секој момент на некаква опасност од страна на туристот да можат да го спасат, додаде ЕУ амбaсадорот, Гир.
Преку проектот планирано е развивање на промотивни материјали: водич, мапи, мобилна апликација и веб страна; набавени се возила за зголемување на капацитетите на општините со цел поддршка на ново поставената инфраструктура како и теренски возила и опрема за спасување во зимски услови. Исто така планирана е набавка на специјализирана опрема за спасување за потребите на хеликоптерската единица при МВР; обука на спасувачи на планина во Албанија според стандардите на ICAR (International Commission for Alpine Rescue); обука на спасувачите од Планинската Спасителна Служба за употреба на опремата за спасување во зимски услови; и креирање на работна група за олеснување на прекуграничните процедури во случај на интервенција на Планинската Спасителна Служба на територијата на Албанија.
Општини, граѓански организации, бизнис асоцијации, универзитети, училишта, јавните установи и институции од двете соседни земји преку соработка да креираат издржани проекти со кои ќе аплицираат за третиот повик најдоцна до 15ти февруари за кој се обезбедени 4.930.000 евра од ИПА 2 Програмата за прекугранична соработка на Европската Унија. Одобрените проекти кои што ќе се имплементираат на територијата на нашата држава ќе ги кофинанисира од Министерството за локална самоуправа, во висина од 15 насто од признаените трошоци.