Следната пандемија со која ќе се соочи светот може да биде десет пати полоша од оваа што моментално се случува, предупреди основачот на „Мајкрософт“, Бил Гејтс.
„Не сме подготвени за следната пандемија. Се надевам дека за две години ситуацијата ќе биде поинаква. Вакцини, тестови, лекови, епидемиологија, надзор, има уште многу да се направи“, рече Гејтс во интервју за германски „Зидојче цајтунг“.
Како што прецизираше, ако бевме подобро подготвени за моменталната пандемија, ако имавме подобри дијагностички капацитети и со тоа полесно да можевме да откриеме заразени, бројот на смртни случаи ќе бил помал, особено во САД.
„Коронавирусот стана составен дел од нашите животи, како и другите настани како што се земјотреси, торнада и климатски промени. Предизвик за владите е да ги заштитат граѓаните од вакви настани“, рече Гејтс.
Гејтс се осврна и на идната пандемија во годишното писмо на неговата фондација. Во него тој изјави дека „подготвеноста за следната пандемија мора сериозно да се сфати како да е закана за војна“.
Тој ги посочи „глобалниот систем на предупредување, масовното тестирање, 3.000 експерти, кои први ќе реагираат на жариштата и потрошени десетици милијарди долари годишно како клуч во борбата против следната пандемија“.
„Треба да потрошиме милијарди за да заштедиме милијарди“, рече Гејтс, алудирајќи на економијата погодена од Ковид-19.
Тој додаде дека светот не е подготвен за пандемијата што не погоди во 2020 година, но се надева дека ќе биде подготвен за следната.
Основачот на „Мајкрософт“ наведува дека треба да се создадат „мега-дијагностички платформи“, подготвени за една недела да тестираат една петтина од светската популација.
Тој исто така изрази надеж за развој на нови терапии, како што се моноклоналните антитела.
Гејтс исто така се надева дека развојот на РНК вакцините може да го отвори патот за развој на нови вакцини, како што се оние против СИДА, маларија или туберкулоза.
Една од неговите идеи е да организира редовни „игри на микроорганизми“ на светско ниво. На нив, научниците би симулирале можна појава на болести и како да се борат против нив, „како што војската се подготвува преку воени игри“, наведува Гејтс.
Гејтс објасни дека неговата фондација инвестирала 1,75 милијарди долари во борбата против Ковид-19.