Европската агенција за лекови (ЕМА) денес објави дека нема откриени нови несакани ефекти кај вакцината против коронавирус развиена од „Бионтек“ и „Фајзер“ во нивниот прв извештај за вакцините против ковид-19.
Во соопштението се наведува дека стручниот одбор на ЕМА ги оценил извештаите за лицата кои починале по вакцинацијата и навел дека нивниот преглед „не укажува на безбедносни проблеми“.
На почетокот на овој месец, норвешките власти ги изменија препораките за вакцинација наведувајќи дека лекарите треба да проценуваат индивидуално слаби и сериозно болни стари лица и да одлучат дали треба да се вакцинираат.
ЕМА заклучи дека податоците за безбедноста на вакцината на „Фајзер“ се собрани „во согласност со познатиот безбедносен профил на вакцините“, а дека сериозните алергиски реакции се познати и ретки се несаканите ефекти.
Се вели дека фреквенцијата на ваквите алергиски реакции била околу 11 случаи на милион дози во Соединетите Држави, но дека сè уште нема споредлива европска проценка.
ЕМА ја одобри вакцината на „Фајзер“ на 21 декември и ѝ даде условна дозвола, па „Фајзер“ и „Бионтек“ мора да доставуваат извештаи за безбедност секој месец.
Агенцијата навела дека „нема промени во препораките во врска со употребата на вакцината“.