Судскиот процес против поранешниот американски претседател Доналд Трамп започнува денес во американскиот Сенат, а постапката е покрената во Претставничкиот дом пред заминувањето на Трамп од власт.
Според Гласот на Америка, Претставничкиот дом се очекува да го презентира обвинението за судењето на Трамп, поранешниот претседател ќе го застапуваат неговите адвокати, додека сенаторите ќе бидат поротници кои треба да одлучуваат за вината на Трамп.
Трамп е обвинет за поттикнување на бунт на неговите приврзаници кои упаднаа на Конгресот на 6 јануари и го држеа под окупација четири часа, за време на специјалната седница на која беше потврдена победата на Џозеф Бајден на претседателските избори подоцна истата вечер.
Пет лица беа убиени за време на насилствата во Конгресот.
Непосредно пред упадот во Конгресот, Трамп ја вжешти атмосферата на протестот во Вашингтон, повторувајќи ги неоснованите тврдења дека бил ограбен на претседателските избори на 3 ноември.
Светските агенции потсетија дека Претставничкиот дом за првпат гласаше за отповикување на Трамп во декември 2019 година, но Сенатот, во кој мнозинство имаа неговите републиканци, го ослободи од обвиненијата на судењето во јануари минатата година.
Трамп е единствениот американски претседател за чие отповикување гласаше двапати Долниот дом на Конгресот.
Trump's lawyers & Republican Senators want us to believe that the #ImpeachmentTrial is "unconstitutional."
So… Did the Founders really think a President could do whatever they want in the last weeks of their term, and get away with it??
Not a MF chance ❌#TrumpImpeachment
— Jake Lobin (@JakeLobin) February 9, 2021
Пред Трамп, Претставничкиот дом ги отповика претседателите Ендру Џонсон во 1868 година и Бил Клинтон во 1998 година, но Сенатот ги ослободи од обвинение.
Во случај на неочекувано осудување на претстојното судење, Трамп ќе стане првиот претседател на САД кого Сенатот го осуди за обвинението на Претставничкиот дом.
Капитол Хил е непосредно пред почетокот на судењето на Трамп во американскиот Сенат, неколку недели по инаугурацијата на претседателот Џозеф Бајден и еден месец по упадот на дел од приврзаниците на Трамп – зградата е опкружена со ограда висока 2,5 метри, прекриена со бодликава жица.
Полицијата во Капитол Хил соопшти дека зголемените безбедносни мерки ќе останат на сила за време на судењето на Трамп.
Неговите претставници тврдат дека случајот е исполитизиран, а судењето е неуставно. Поранешниот претседател веќе објави дека нема да се појави пред членовите на американскиот Сенат, а американската јавност е претежно поделена околу ставот дали поранешниот претседател треба да биде осуден и забранет повторно да се кандидира.
You know what would help this country “heal and move on”? The impeachment, conviction, and criminal prosecution of Donald J. Trump.
— Robert Reich (@RBReich) February 8, 2021
Демократите, кои се во улога на обвинители во овој процес, ќе се обидат да ги убедат сенаторите, кои имаат улога на поротници, дека Трамп ја носи единствената одговорност за насилната опсада на седиштето на американската законодавна власт.
Од друга страна, адвокатите на поранешниот претседател тврдат дека процесот на отповикување против него, како што тврдат, е политички театар, дека Трамп го искористи правото на слобода на говорот и дека ги охрабри приврзаниците да протестираат мирно.
Демократите тврдат дека поранешниот претседател нема валидна одбрана.
Судењето на Доналд Трамп во Сенатот се очекува да трае најмалку една недела.