Минатата година банкарскиот систем во Словенија остварил профит од 450 милиони евра по оданочување, што е за 15,1 процент помалку од претходната година, покажуваат податоците на Банката на Словенија.
Како што истакнуваат во словенечката централна банка, релативно поволни деловни резултати се постигнати поради спојувањето на Нова КБМ и Абанка, бидејќи без тој ефект, профитот би бил помал за повеќе од половина, пренесува seebiz.eu.
Вкупното салдо на банкарскиот сектор во Словенија во 2020 година се зголеми за повеќе од 8 проценти (за 3,4 милијарди евра) на 44,65 милијарди евра. Како што е истакнато, депозитите на небанкарскиот сектор сè уште се главен фактор во зголемувањето на вкупните средства. Депозитите на домаќинствата, кои сочинуваат две третини од сите депозити во небанкарскиот сектор, се зголемија за над 10 проценти минатата година, од 20,3 на 22,4 милијарди евра.
Во декември, депозити на небанкарскиот сектор продолжија да растат, додека од друга страна, заемите кон компаниите паднаа, а потрошувачките кредити продолжија да опаѓаат. Растот на заемите на компаниите во Словенија е негативен од август минатата година и во декември достигна пад од -1,4 проценти на годишно ниво. Најголем придонес за ова даде декемврискиот пад на обемот на заеми за 186 милиони евра.
Растот на заемите на домаќинствата забави кон крајот на минатата година и достигна само 0,1 процент на годишно ниво во декември. Ова особено се должи на падот на обемот на потрошувачки кредити од година на година (од -7,8 проценти), што се совпадна со економската неизвесност и влошувањето на епидемиолошката состојба на крајот на минатата година.
Сепак, Банката на Словенија нагласува дека банкарскиот сектор продолжува да одржува добра позиција на капитал и ликвидност.