Претседателот на Европскиот совет, Шарл Мишел, вечерва рече дека производството и испораката на вакцини, како и вакцинациите против Ковид-19 низ цела Европска унија, се приоритет број еден и посочи дека тука спаѓа и работата за зголемување на производството на вакцини .
„Тековната состојба е тешка“, но би сакал да испратам порака за оптимизам. „Имаме средства да осигуриме дека ЕУ игра клучна улога во надминувањето на кризата во следните месеци“, рече Мишел.
„Ние сакаме поголема предвидливост и транспарентност од фармацевтските компании“, објави Мишел на својот официјален профил на Твитер по завршувањето на самитот на ЕУ, што се одржа преку Интернет.
„Епидемиолошката состојба останува сериозна, а новите варијанти (на коронавирус) претставуваат дополнителни предизвици. Затоа, ние мора да одржуваме строги ограничувања, истовремено интензивирајќи ги напорите за побрза испорака на вакцината“, изјавија лидерите на ЕУ по првиот ден од самитот преку Интернет.
Претседателот на Европската комисија, Урсула фон дер Лејен, оцени дека се во сила заштитни мерки, кои се на сила низ цела Европа и додаде дека се работи на испитување на нови варијанти на Ковид.
„Нашите напори ќе се исплатат“, рече фон дер Лејен.
Со Европската унија во моментов претседава Португалија, чиј премиер Антонио Кошта објави дека за време на денешната седница, тој ја истакнал важноста за забрзување на вакцинацијата, заедно со економското закрепнување.
„Договорите за дистрибуција на вакцините мора да бидат исполнети и треба да се зајакнат капацитетите за нивно производство, дистрибуција и одобрување во Европската унија“, рече Кошта.
Претседателот на Европскиот совет изјави дека темата на вториот ден од самитот ќе бидат безбедноста и одбраната.
Генералниот секретар на НАТО, Јенс Столтенберг, ќе се приклучи на видео конференција во размена на мислења за соработката меѓу ЕУ и НАТО.
„Ќе разговараме за тоа како да ја подобриме нашата заедничка способност да одговориме на безбедносните предизвици и закани“, додаде Шарл Мишел, додавајќи дека би сакал да се посвети внимание на сајбер нападите и хибридните закани што претставуваат вистински безбедносни предизвици.