Поранешниот претседател на Србија, Борис Тадиќ и програмскиот директор на белградскиот Фонд за политичка извонредност, Марко Савковиќ во емисијата „Н1 директно“ изјавија дека е важна резолуцијата на Европскиот парламент, како и фактот дека во неа се споменуваат конкретни случаи, односно скандали за кои се зборува во Србија во последниве години, како Јовањица, уривањето во Савамала или настаните поврзани со Телеком.
Според Н1, Тадиќ смета дека опозицијата на следните избори, доколку им се создадат фер услови, треба да оди во неколку колони, додека Савковиќ вели дека има надеж дека меѓупартискиот дијалог може да успее, но дека е свесен дека таа надеж е „тенка“.
На 25 март, европратениците го усвоија извештајот за Србија со 538 гласа за, 69 против и 79 воздржани. Аферите „Крушик“, „Јовањица“, „Телеком Србија“, како и уривањето во Савамала, останаа во извештајот на ЕП за Србија, откако Европскиот парламент го изгласа вториот дел од членот 24 на пленарната седница. Пратениците, по барање на Европската народна партија, го изгласаа овој член „по делови“ (split vote), а сите триа беа усвоени на сесијата, пишува ЕВБ. Вториот дел, во кој се споменуваат овие скандали, го изгласаа 407 европратеници „за“, додека 198 беа против. Во последниот текст на извештајот има и осуда за нападот врз порталот КРИК и невладината организација ЦРТА, пренесе ЕВБ.
Тадиќ рече дека е важно специфичните случаи да бидат споменати во резолуцијата на Европскиот парламент, но дека тоа не е прв пат.
– ЕП отсекогаш ги разгледуваше проблемите поврзани со корупциските скандали, и тоа не е посебно изненадување, но овој пат акцентот е јасно ставен, бидејќи јавноста успеа да се обиде да ги објави овие скандали, за да покаже до кој степен државата е украдена од граѓаните, да се види кој ги краде нивните пари на организиран начин, што има силна поддршка од владејачката партија, посочи Тадиќ.
Според него, ЕУ ќе продолжи да инсистира преку своите институции овие скандали да бидат решени.
– Сепак, засега, власта им пристапува на лаконски начин. Ниту една афера не е решена, без оглед на судската постапка за Јовањица. Сè мора да се реши, нагласи Тадиќ.
Марко Савковиќ рече дека секоја земја што сака да стане членка на ЕУ мора да ги реши најголемите скандали и додаде дека очекува дека ЕУ ќе продолжи да инсистира на ова, на решавање на скандалите. Бидејќи, како што изјави, не можеме да зборуваме за владеење на правото додека не се решат аферите.
Тој потсети дека Хрватска влезе во ЕУ откако ја доведе до крај аферата Санадер.
– Не мислам дека постои српска верзија на аферата Санадер. Имаме неколку отворени работи, и јас не би ги рангирал. Тие исто така зборуваат за ситуацијата со Савамала, која не е решена, и за другите, сите заедно, рече Савковиќ.
Тадиќ, сепак, не се согласува.
„Сите оние случаи споменати во овој извештај можеа да бидат дел од некои претходни. Јовањица, Савамала не е создадена сега… Имаме ние „Санадери“ тука, тие се Вучиќ и Брнабиќ, бидејќи криминалот започнува од врвот. Во наше време, тој злостор тргнуваше од криминалците и одредени тајкуни, сега нема јасна разлика помеѓу партијата на власт и организираниот криминал“, рече Тадиќ.