На парламентарните избори во Албанија на 25 април ќе учествува и огранок на партијата на Самоопределување на косовскиот премиер Албин Курти, пишува германскиот весник Франкфуртер алгемајне цајтунг (ФАЦ) и прашува дали зад тоа стојат „соништа за „Голема Албанија“.
„Фактот дека партијата сега води кампања на изборите во соседната земја, со истоимен огранок и дека самиот Курти учествуваше во кампањата таму, се разбира, не наидува на ентузијазам кај албанскиот премиер Еди Рама“, пишува ФАЦ.
Весникот додава дека Самоопределување засега не е регистрирано како политичка партија во Албанија, но дејствува како граѓанска иницијатива што поддржува независни кандидати на парламентарните избори, сепак, во догледно време, се планира да се претвори во партија, пренесе „Дојче веле“.
Еден од кандидатите на изборите во Албанија, Бојкен Абази, кој е и директор на граѓанската иницијатива Самоопределување во Тирана, избегна директен одговор на прашањето дали ги следи упатствата од Курти.
„Би било голема загуба за мене и за нашата организација овде, доколку Албин не најде време да се консултира со нас. Ги почитувам неговите длабински анализи и совети. Ние не го следиме секогаш тоа, но добро е да ги слушнеме неговите идеи“, рече Абази.
Меѓу тие идеи за многу години е ставот дека би било подобро и за Албанија и за Косово да се обединат во заедничка држава, а како што наведува ФАЦ, тоа е она што го пропагира Абази.
„Се разбира, тоа нема да се случи утре или во наредните години. Би било популистичко да се тврди такво нешто“, рече Абази.
Самоопределувањето се стреми кон „мирен и демократски процес“ во кој ќе се одржи „референдум за обединување на двете земји“. Абази рече дека резултатот е предвидлив бидејќи анкетите во Албанија и Косово покажуваат дека повеќе од две третини од „Албанците би гласале за обединување на референдум“.
Курти најави дека Самоопределување ќе се ангажира и во Северна Македонија, каде Албанците сочинуваат околу една четвртина од населението.
Степенот до кој Самоопределувањето би можело да биде успешно во соседните земји во голема мера ќе зависи од тоа дали „матичната партија“ на Косово ќе ги исполни огромните очекувања поврзани со Албин Курти, рече албанскиот политиколог Рамзи Лани.
„Навистина, само ако Курти е успешен на Косово, ограноците на Самоопределување во Албанија и на други места можат да станат привлечни за граѓаните. Во исто време, тоа е сосема поинаква приказна до кој степен ова може да доведе до дополнителна нестабилност на целиот Балкан, доколку е при рака програмата за обединување на Курти“, предупреди новинарот на ФАЦ, Мајкл Мартенс.