Светската здравствена организација (СЗО) денес објави дека повеќе од половина од новите инфекции во светот од минатата недела се во Индија и Бразил, на кои им испратиле помош од агенцијата на Обединетите нации и други групи.
Според Универзитетот Џон Хопкинс, Индија минатата недела забележала рекордни 2.612.354 нови инфекции, а Бразил 414.123.
Генералниот директор на СЗО, Тедрос Аданом Гебрејесус, на прес-конференција во Женева изјави дека СЗО и нејзината фондација испратиле медицинска опрема и материјали во Индија, вклучително и боци со кислород и подвижни полски болници, објави „ВОА њуз“.
Тој исто така ги советува семејствата како да се грижат за болните дома во ситуација доколку не успеат да најдат празен кревет во болниците.
Тедрос истакнал дека она што се случува во Индија и Бразил може да се случи насекаде, освен ако не се преземат мерките за јавно здравје што СЗО ги повикуваше од почетокот на пандемијата, како што се носење маски, социјално дистанцирање и соодветна хигиена.
„Вакцините се дел од одговорот, но тие не се единствениот одговор“, рекол тој.
Генералниот директор на СЗО се надева на состанокот на Г-7 што ќе се одржи следниот месец во Велика Британија и ги повика лидерите на седумте најразвиени економии во светот да помогнат во финансирање на дефицитот од 19 милијарди долари на програмата Ковакс.