Агенти од Федералното биро за истраги на САД (ФБИ) отвориле оган na човек пред седиштето на Централната разузнавачка агенција (ЦИА) во Ленгли, Вирџинија.
Властите наведуваат дека човекот се обидел да влезе во објектот со возило околу 18 часот по локално време, но дека не успеал да го помине главниот влез, кој се наоѓа далеку од зградата на агенцијата, пренесe Анадолија.
Агентите се обидувале да преговараат со човекот со часови и на крајот решиле да го отстранат неговиот автомобил. Возачот наводно излегол од автомобилот со оружје и потоа бил застрелан. Неговата здравствена состојба во моментов е непозната.
Постојат извештаи дека човекот рекол дека има експлозив во автомобилот, но нема потврда за тоа. Претставници на ФБИ наведуваат и дека човекот можеби имал психички проблеми и дека е можно во минатото да се обидел да влезе во кампусот на ЦИА.
„ФБИ сериозно ги сфаќа сите инциденти со пукање во кои се вклучени наши агенти или членови на работната група. Процесот на ревизија е темелен и објективен и се спроведува експедитивно во дадените околности“, се наведува, меѓу другото, во соопштението.
Безбедносните мерки во владините згради околу Вашингтон се екстремно заострени оваа година од немирите во американскиот Капитол во јануари.
Во април, еден полицаец во Капитол беше убиен, а друг повреден кога маж се обиде да го удри својот автомобил во бариерата околу зградата на Конгресот и седиштето на Федералното законодавство на САД