Косовската претседателка Вјоса Османи изјави дека го известила словенечкиот претседател Борут Пахор дека Косово ќе го продолжи дијалогот со Србија, но дека нема да разговара за промена на границите и дека Косово нема да ја откаже тужбата против Србија за геноцид.
„Нашиот статус беше утврден на 17 февруари 2008 година, како и границите, поради што ја истакнав подготвеноста на Косово да биде дел од дијалогот. Косово ќе седне на маса и ќе разговара за важни прашања, како што е прашањето за исчезнатите лица“, рече Османи на заедничката конференција со нејзиниот словенечки колега.
Додаде дека Косово нема да се откаже од тужбата против Србија за геноцид.
„Јас претходно изјавив, тоа е заеднички договор на трите институции, затоа што секоја позиција ја координираме со премиерот Курти и претседателот на парламентот, а тужбата за геноцид е она за што целосно се согласуваме. Нашиот одговор е дека е извршен геноцид на Косово. Подготовката на тужбата мора да биде многу сериозна, со детално истражување и ќе соработуваме со која било држава што ќе ни помогне да ја оствариме правдата“, истакна Османи.