Израел натрупува копнени сили долж границата со Газа, откако продолжуваат најжестоките судири во последните неколку години. Додека светските сили ги повторуваат повиците за смирување, бранот насилство меѓу Евреите и арапското малцинство продолжува да се шири во неколку израелски градови со напади врз синагоги и арапско-еврејски судири на улиците.
Во Тел Авив во текот на ноќта се огласија сирени, а звукот на ракети што го урнаа израелскиот антиракетен систем „Железна купола“ го исполни небото додека илјадници Израелци бегаа за да се скријат.
Иако израелските воени претставници изјавија дека не се изненадени од потезите на Хамас во последната серија напади врз Тел Авив, Ерусалим и други градови, некои воени експерти признаа дека брзината на ракетите е неочекувана, пишува „Хаарец“.
За неколку дена беа истрелани околу 1.600 ракети, а во најголемото единечно гранатирање беа испукани 140 проектили кон Ашкелон. Околу 200 ракети беа истрелани кон градовите во централниот дел на Израел.
На состанокот зад затворени врати, главната тема биле ракетите со долг дострел на Хамас. Досега војската верувала дека ракети со најдолг дострел што ги поседува Хамас R-160, има максимален дострел од 160 километри. Ракетата истрелана на аеродромот Рамон во близина на Еилат, оддалечена повеќе од 200 километри од точката на истрелување, изненади некои експерти во армијата.
Од четвртокот попладне, војската спречи пет обиди на Хамас да лансира беспилотни летала полни со експлозив кон Израел. Во меѓувреме, се проценува дека воздухопловните сили извршиле повеќе од 100 напади дневно врз Газа.
Досега се уништени четири високи згради во Газа, а според армијата, убиени се 60 оперативци на Хамас и исламски џихадисти. Уништени се околу 160 ракетни фрлачи.
Воздушните напади беа насочени кон значително оштетување на капацитетите за производство на ракети на Хамас, пишува уште „Хаарец“.