Формула 1 објави дека Големата награда на Турција, трка што првично требаше да се одржи од 11 до 13 јуни, е откажана.
„Формула 1 усвои измени во тркачкиот календар за 2021 година и со нови ограничувања на патувањето поради коронавирусот, веќе не е можно да се одржи трката во Турција од 11 до 13 јуни“, се вели во соопштението.
Тој викенд ќе остане слободен, Големата награда на Франција ќе се премести една недела однапред во споредба со периодот од 18 до 20 јуни, а во Австрија ќе се одржат две трки – првата од 25 до 27 јуни, а втората од 2 до 4 јули.
На календарот има 23 трки, а досега се одржани четири – во Бахреин, Италија, Португалија и Шпанија. Петтото коло е во Монако на 23 мај.
„Со нетрпение ја очекувавме трката во Турција, но ограничувањата за патување ни го прават тоа невозможно“, рече извршниот директор на Формула 1, Стефано Доменикали.
Големата награда на Турција се врати во 2020 година по деветгодишна пауза. Британскиот возач на Мерцедес, Луис Хамилтон ја освои титулата во 2020 година со првото место на Intercity Истанбул паркот во ноември минатата година.
Оваа сезона, Големата награда на Турција ја замени Големата награда на Канада поради пандемијата.
Турција е во „локдаун“ до 17 мај, а на 12 мај Велика Британија ја додаде Турција на својата црвена листа на туристички дестинации со цел да се запре ширењето на коронавирусот.