Продолжува судењето на поранешниот француски претседател Никола Саркози за нелегално финансирање на неуспешната изборна кампања во 2012 година, откако беше прекината во март поради инфекција на адвокатот со коронавирус.
Судењето фрла нова сенка на кариерата на Саркози, кој беше претседател од 2007 до 2012 година.
Поранешниот француски претседател веќе е осуден за корупција во посебен случај и ја обжали пресудата од 1 март.
Обвинителите тврдат дека Конзервативната партија на Саркози потрошила скоро двојно повеќе од 22,5 милиони евра дозволени според изборниот закон за раскошни изборни митинзи и потоа ангажирала пријателска агенција за односи со јавноста за да ги покрие трошоците, пишува Хина.
Обвинителите посочуваат дека нивната истрага не успеала да докаже дали Саркози организирал сè или бил вмешан во заговорите, но велат дека тој сигурно бил свесен за тоа.
Саркози постојано ја негираше вината и рече дека не знае за постапката за лажно собирање. Ако му се докаже вината, му се заканува затвор од една година и парична казна до 3.750 евра.
Џером Лаврило, потпретседател на кампањата на Саркози за 2012 година и еден од 13 обвинети, призна дека го надгледувал пренасочувањето на средствата исплатени на ПР агенцијата „Бигмалион“ за да ги покријат трошоците. Тој рече дека постапил самоиницијативно.
На двајца соосновачи на „Бигмалион“ исто така им се суди. Еден од нив призна за лажна наплата. Нивниот адвокат во 2014 година изјави дека фирмата работи под политички притисок.