На Вол стрит цените на акциите малку паднаа во вторникот, откако запишаа раст претходниот ден, бидејќи инвеститорите се претпазливи за зголемувањето на инфлациските притисоци во САД.
Дау Џонс падна 81 поен, или 0,24 проценти, на 34.312 поени, додека S&P 500 се лизна за 0,21 процент, на 4.188 поени, а индексот Насдак се лизна за 0,03 проценти, на 13.657 поени.
По значителниот скок претходниот ден, вчера овие индекси изгубија дел од добивката затоа што инвеститорите не сакаат да преземаат дополнителни ризици се додека не стане појасна сликата во врска со инфлацијата.
Оваа недела ќе биде објавен извештај за лична потрошувачка во САД, што може да даде појасна слика за нивото на кое се движи инфлацијата.
Пред две недели беше објавено дека потрошувачките цени се зголемија со највисока стапка во последните 12 години, зголемувајќи ги загриженоста за инфлацијата и поттикнувајќи ја несигурноста на пазарот.
Иако водачите на американската централна банка од ден на ден велат дека инфлацијата треба да биде привремена и ќе продолжи да спроведува стимулативни политики, инвеститорите стравуваат дека ФЕД наскоро би можела да биде принуден да ги намали стимулациите, кои веќе една година го поддржуваат закрепнувањето на економијата од корона-кризата и растот на Вол Стрит.
Неодамнешниот извештај од последниот состанок на ФЕД покажа дека неколку лидери на ФЕД веруваат дека во случај на понатамошен брз економски раст, наскоро треба да се отвори дебата за намалување на програмата за откуп на државните обврзници, која беше започната за подобрување на ликвидноста на финансискиот систем и зачувување на каматните стапки ниско.
Меѓу најважните сектори на индексот S&P 500, цените на акциите во енергетскиот сектор вчера паднаа најмногу, за над 2 проценти, додека секторот за недвижнини беше меѓу најголемите добитници, со раст од 0,3 проценти.
Откако неодамна падна за 4,3 проценти под своето рекордно ниво, достигнато на 7 мај, S&P 500 сега е на само 1 процент од тоа ниво бидејќи во меѓувреме закрепнаа акциите во технолошкиот сектор.
Вчера претпазливо се тргуваше и на европските берзи. Лондонскиот FTSE падна за 0,31 процент, на 7.029 поени, а париски CAC за 0,28 проценти, на 6.390 поени. Франкфуртски DAX, пак, порасна за 0,18 проценти на 15.465 поени.