На денешната седница, Собранието на Албанија гласаше за разрешување на претседателот на земјата Илир Мета, по барањето поднесено од владејачката партија, Социјалистичката партија на Албанија.
За разрешување гласаа 104 пратеници, седум беа против, а тројца беа воздржани, од вкупно 114 важечки ливчиња, пренесе Анадолија.
На почетокот на седницата беше презентиран и потоа одобрен извештајот на собраниската анкетна комисија, кој ги испитуваше доказите според кои претседателот на Албанија, Илир Мета, извршил „сериозни повреди на Уставот“.
„Едностраните или неурамнотежени ставови на претседателот, особено оние што поттикнуваат насилство, губење на неутралната улога на шеф на државата, која не е вклучена во дневната политичка игра, но треба да биде над страните и да обезбеди демократско функционирање на институциите, се се тоа дејствија што ги изгуби атрибутите на шефот на државата и претставникот на единството на народот“, се вели во извештајот на истражната комисија.
Во меѓувреме, Собранието ќе ја упати одлуката за разрешување до Уставниот суд, кој кога ќе ја докаже вината на претседателот на државата, прогласува негово отстранување. Според Уставот, претседателот може да биде разрешен за сериозно кршење на Уставот и за сериозно кривично дело.
Според Уставот, во случај претседателот да биде разрешен и местото да остане испразнето, неговото место ќе го заземе претседателот на албанскиот парламент.
Од друга страна, советникот за медиуми и портпарол на претседателот Мета, Теди Блуши, реагираше на денешната одлука, објавувајќи на социјалните мрежи: „Нула загриженост за неуставната и смешна одлука на монистичката парламентарна депонија“.