„Франција верува дека може да го реши спорот со шампањското со Русија преку дијалог, но доколку е потребно, ќе се обрати кон Светската трговска организација (СТО)“, рече францускиот министер за надворешни работи Жан-Ив Ле Дријан
Тој рече дека во наредните денови, Париз ќе се обиде да најде решение во соработка со руските власти на билатерално, но и на европско ниво, со цел да ги заштити интересите на француските производители и заштитените географски индикации.
„Ако има повремени прекршувања на правилата на Светската трговска организација, секако дека ќе постапиме како што планиравме претходно кога станува збор за Русија. Се надевам дека дијалогот ќе овозможи овој спор да се реши“, рече министерот во парламентот.
Француските производители поднесоа приговори
Рускиот закон, потпишан во петокот, воведува обврска дистрибутерите на шампањ да наведат на етикетата на задниот дел од шишето дека е пенливо вино, додека името „шампанско” е резервирано за руските производители на пенливо вино.
Одлуката предизвика незадоволство кај француските производители на шампањ, кои поднесоа жалби до француското Министерство за надворешни работи и Европската унија.
„Тој закон ја следи логиката на руските протекционистички мерки во винскиот сектор“, рече Ле Дријан, додавајќи дека тие веќе се обратиле до СТО во врска со прашањето на заштитените географски ознаки. Русија е 15-ти извозен пазар за шампањ, продавајќи околу два милиони шишиња од вкупно 150 милиони, колку што се продава во просек надвор од Франција секоја година.