Најмалку 12 лица загинаа во градот Женгжу од почетокот на големите поплави во централниот дел на Кина, а повеќе од 10.000 луѓе беа евакуирани во засолништата во провинцијата Хенан.
Главниот град Женгжу беше најтешко погоден откако го погодија најобилните дождови, како што рекоа метеоролозите, „во последните илјада години“.
Луѓето мораа да ги напуштат своите домови, а водата ги преплави патиштата и инфраструктурата. Слики од улици под вода беа прикажани на социјалните мрежи, додека водата носи автомобили и остатоци.
Повеќе од 12 градови беа погодени, главните патишта беа затворени и летовите беа откажани, објави Би-Би-Си.
record breaking rainfall and huge floods in Henan, China#ClimateCrisis pic.twitter.com/AmFRCtR3yb
— Chenchen Zhang🤦🏻♀️ (@chenchenzh) July 20, 2021
Провинцијата Хенан, каде живеат 94 милиони луѓе, издаде највисоко ниво на метеоролошко предупредување по невообичаено активната дождовна сезона.
Многу фактори придонеле за поплавите, а глобалното затоплување како резултат на климатските промени ја зголемува веројатноста за екстремни врнежи од дожд.
Постојат стравувања дека брана во провинцијата Хенан може да попушти бидејќи претходно била оштетена во невреме.
На браната во градот Луојанг се појави пукнатина долга 20 метри, соопштија властите. Во областа се распоредени војници, а армијата најави дека браната може да се сруши „во секој момент“.
Метеоролозите предвидоа продолжување на дождот во регионот најмалку во следните 24 часа.