Секоја промена во Дејтонскиот договор за нас е апсолутно неприфатлива и секое непочитување на процедурите, што произлегоа од Дејтонскиот договор, за нас е апсолутно неприфатливо, изјави денеска министерот за внатрешни работи на Србија, Александар Вулин.
– Државата Србија е против какво било наметнување, не можеме да прифатиме никаква одлука што не е прифатена од трите конститутивни народи и двата ентитета што ја сочинуваат БиХ – рече Вулин во Дрвар кога беше запрашан да ја коментира дипломатската нота на руската амбасада, која вели дека не го признава Кристијан Шмит за висок претставник во БиХ.
Тој додаде дека Руската Федерација, како членка на Мировниот комитет и како една од земјите што го гарантираат Дејтонскиот договор, има право на свои ставови, но дека не може да ги коментира, објави МВР.
– Многу сме загрижени за се што се случува во БиХ, загрижени сме за притисоците што постојат врз Република Српска, загрижени сме за фактот дека се воведуваат закони што треба да ја наметнат вистината, а вистината не може да ја наметнат закони. Загрижени сме бидејќи таквите закони секогаш важат само за Србите, загрижени сме за можноста овие закони да станат средство, политички ќотек, со кое ќе ги апсите непослушните, ние сме загрижени бидејќи атмосферата во БиХ се влоши – рече Вулин.
Оцени и дека се чини дека поранешниот висок претставник сака да им се одмазди на сите народи во БиХ.
– Дали затоа што не го сакаа или затоа што не ја сакаше земјата во која живееше и работеше, туку 12 дена пред да замине, на денот кога Австро-Унгарија испрати сличен ултиматум пред повеќе од 100 години, но до Кралството Србија, тој ден, наметна закон што се чини дека има за цел трајно да ги затруе односите во БиХ, трајно да се кара со луѓето што живеат тука – рече Вулин.
Тој апелираше до сите политичари никогаш да не наметнуваат ништо, туку да се грижат за демократските процедури, да ги почитуваат бидејќи, како што рече, тоа е единствениот начин да владее мир и разбирање во БиХ и во целиот регион.