Русија е во контакт со талибанските претставници преку својата амбасада во Кабул, изјави денеска специјалниот претставник на рускиот претседател Владимир Путин за Авганистан, еден ден по падот на авганистанската влада и заземање на главниот град на исламистичката бунтовничка група, пренесе Танјуг.
„Тие разговараат во Кабул. Во моментов, сите контакти се воспоставени таму. Амбасадата се занимава со тоа“, рече претставникот на Русија, Замир Кабулов, во изјава за Ројтерс.
Контактите започнаа кога Талибанците распоредија стража во руската амбасада откако бунтовниците го зазедоа Кабул.
„Помина апсолутно мирно и без инциденти. „Тие (Талибанците) дојдоа и ја преземаа (амбасадата) под стража“, рече тој.
„Нашата амбасада ќе остане во контакт со специјално назначени претставници на високото раководство на Талибанците со цел да развие постојан механизам за обезбедување безбедност на нашата амбасада“, додаде Кабулов.
Талибанците во традиционална облека денеска влегоа во амбасадата, изјави портпаролот на руската амбасада, Никита Ишченко, за Ројтерс.
„Денес тие ги заменија претставниците на дежурните владини сили со мирно целосно разоружување и заземање на местото на полицијата“, рече тој.
Западните земји брзаат да го евакуираат персоналот од нивните амбасади во Кабул, а Кабулов за руска радио станица изјави дека Русија, исто така, ќе повлече дел од своите 100 вработени во својата амбасада.
„Дел од нашиот персонал ќе биде испратен на одмор или евакуиран на некој друг начин“, рече Кабулов.
Подоцна тој за Ројтерс изјави дека тоа нема да биде евакуација.
„Некои вработени ќе заминат на одмор додека летото се уште не е завршено“, рече тој, но одби да каже колку членови на руската мисија ќе бидат повлечени од Авганистан.
Кабулов за РИА Новости изјави дека Русија нема да брза со одлуката за признавање на новите авганистански власти и дека ќе ги следи постапките на новите власти за да можат да донесат одлука дури тогаш.
Кабулов за руската телевизија Канал 1 изјави дека Русија не гледа директна закана од Талибанците за Централна Азија.
„Не гледаме директна закана за нашите сојузници во Централна Азија. Нема факти што го докажуваат спротивното“, рече Кабулов, пренесе руската агенција ТАСС.