Руски „Газпром“ не резервираше дополнителен капацитет за транзит на природен гас преку Украина на денешната аукција за ноември, објавија во понеделникот руските медиуми.
Украинскиот оператор на системот за пренос на гас во понеделникот понуди транзитни капацитети за ноември до 9,8 милиони кубни метри дневно преку дистрибутивната станица „Суџа“ и до 5,2 милиони кубни метри дневно преку станицата Сохрановка“. Но, според резултатите од аукцијата, немаше побарувачка за овие капацитети.
Наддавањето се одржа за капацитет покрај резервацијата врз основа на долгорочниот договор на Русија со Украина за 40 милијарди кубни метри годишно (околу 109,5 милиони кубни метри дневно).
Во октомври, „Газпром“, исто така, не резервираше дополнителен капацитет за транзит на природен гас преку Украина, а во септември резервираше само 4,3 проценти од понудениот капацитет.
Покрај тоа, „Газпром“ резервираше само 31,4 милиони кубни метри дневно за ноември од 89 милиони кубни метри понудени на аукцијата за гасоводот Џамал-Европа, преку Полска. Гасоводот минува низ Русија, Белорусија, Полска и Германија. Неговиот предвиден капацитет е 32,9 милијарди кубни метри гас годишно.
Во декември 2019 година, Москва и Киев се согласија да го продолжат транзитот на руски гас преку украинска територија за периодот од 2020 до 2024 година, со можност за продолжување на договорот за уште 10 години. Договорот предвидува транзит на 65 милијарди кубни метри гас во 2020 година и 40 милијарди кубни метри од 2021 до 2024 година.
Транзитниот аранжман е склучен со принципот „пумпај или плати“, т.е. надоместокот за транзит се наплатува во висина на резервираниот капацитет, дури и ако се покаже дека вистинските количини се помали.
Транзитот на руски гас кон Европа преку украинскиот систем за пренос на гас минатата година изнесува 55,8 милијарди кубни метри, што е најниско во последните 30 години.
Извршниот директор на Нафтогас, Јури Витренко рече дека дневните количини на гас што се пумпаат низ украинската територија се скоро преполовени од почетокот на оваа година.