Западот го одобрува заоштрувањето на ситуацијата на Балканот, поради што косовските екстремисти во секој момент можат да предизвикаат конфликт на полуостровот, напиша на „Телеграм“ портпаролката на Министерството за надворешни работи на Русија, Марија Захарова.
„Ситуацијата на Балканот се влошува, фитилот на балканското буре барут може да се запали во секое време поради дејствијата на косовските екстремисти, со соучесништво или директно охрабрување на западните патрони“, рече Захарова.
Според неа, албанските радикални сили „продолжуваат со упорни обиди да се ослободат од Србите“ на Косово.
Официјалниот претставник на Министерството за надворешни работи на Русија потсети дека косовските специјалци есенва двапати упаднале на северот на покраината, каде што живеат Срби.
„Изворот на проблемот во Косово се албанските ултранационалисти кои ја презедоа власта таму и кои се особено активни да ги покажат своите мускули пред локалните избори (првиот круг се одржа на 17 октомври, додека вториот е закажан за 14 ноември). Ним им помагаат некои западни земји, особено оние кои во 1999 година започнаа агресија врз Југославија со цел да се оттргне Косово од Србија, без да се земат предвид бројните човечки жртви“, рече таа.
Според неа, Западот сега се обидува да ја натера Србија да се откаже од националните интереси и историската меморија.
„Велика Британија овојпат директно ги охрабри косовските провокатори. Според откриените податоци, организацијата на антисрпското самоволие ја благословил британскиот амбасадор во Приштина и неговиот сонародник кој ја предводи мисијата на ОБСЕ.
Постои причина да се верува дека развојот на сложено воено сценарио насочено кон окупација на областите населени со Срби во покраината започна во јули“, додаде портпаролката.
Така, според неа, британските инструктори обучувале припадници на косовската полиција, додека испратени агенти ја следеле ситуацијата во северните општини и ги снимале демонстрантите за време на конфликтот.
„Се чини дека Британија, чија политичка елита се фали дека припаѓа на општество на цивилизирани држави, всушност не може да се ослободи од колонијалните навики. Геополитичките експерименти на Лондон оставаат темноцрвени траги“, истакна Захарова.