Местото на сите земји од Западен Балкан е во Европската Унија, изјави бугарскиот министер за надворешни работи Светлан Стоев пред присутните на билатералните средби на колегите од Косово, Црна Гора, Босна и Херцеговина и Србија, кои се одржаа во Брисел на 15 ноември, соопшти прес-центарот на бугарското МНР.
Првите дипломати од земјите од Западен Балкан престојуваа во главниот град на Белгија за да учествуваат на работниот состанок на земјите од Процесот за соработка во Југоисточна Европа (ПСЈИЕ).
Бугарија и Косово имаат блиски, пријателски и искрени односи, изјави Стоев на средбата со неговата косовска колешка Доника Гервала-Шварц Двајцата соговорници се согласија за потребата од јасна европска перспектива за земјите од регионот, вклучително и Косово.
Бугарија и Црна Гора денеска имаат силни историски врски и односи кои динамично се развиваат, рече министерот Стоев во разговорот со црногорскиот прв дипломат Јоргос Радуловиќ. Радуловиќ се заблагодари на својата земја за поддршката што ја добива од Бугарија во процесот на европска интеграција.
„Во 2022 година ќе одбележиме 30 години од признавањето на Босна и Херцеговина од Бугарија како суверена и независна држава. Загрижени сме за моменталната ситуација во земјата и повикуваме на конструктивен дијалог, целосно функционирање на институциите и продолжување на реформски процес. Бугарија го поддржува територијалниот интегритет и суверенитет на Босна и Херцеговина“, истакна министерот Светлан Стоев во разговорот со босанската колешка Бисера Турковиќ. Таа го информираше шефот на бугарската дипломатија за тешката политичка ситуација во земјата и за проблемите со кои се соочува.
Енергетската соработка и надминување на тешките социјални и економски последици од пандемијата во услови на поскапување на енергенсите и потребата од преземање мерки за поддршка на бизнисот и домаќинствата беа главните теми на разговорот на шефот на бугарската дипломатија со шефот на српската дипломатија Никола Селаковиќ .