Компанијата што произведува електрични возила – Rivian, веќе е трет најскап производител на возила во светот. Необичен факт за Rivian е дека приходот на компанијата е нула.
Помина една недела од дебито на Rivian во Nasdaq, а цената на акциите постојано расте. Rivian се проценува на повеќе од 140 милијарди долари.
За споредба, Volkswagen има пазарна капитализација од 139 милијарди долари, а Toyota 306 милијарди долари, Tesla се проценува на речиси 1 трилион долари.
Вчера акциите на компанијата вредеа околу 159 долари по акција. Кога компанијата дебитираше минатата недела, цената беше 78 долари.
Првите испораки на електрични пикапи на Rivian беа направени пред само два месеци и повеќето од нив беа за вработените во Rivian, пишува CNN.
Сепак, компанијата предизвика огромен интерес кај инвеститорите, веројатно поради поддршката од Amazon, кој купи 20% од акциите во 2019 година.
Еуфоријата околу електричните возила не е ништо ново – многу аналитичари, па дури и шефот на Tesla, Елон Маск, велат дека рејтингот на Tesla е превисок, но акциите на компанијата продолжуваат да растат поради идните планови за електрификација.
Сепак, Rivian има потенцијална предност во однос на Tesla на американскиот пазар. Најпроизведениот производ на компанијата не е само електричен автомобил, туку пикап. Ова е важно за компанијата бидејќи првите три најпопуларни возила во САД се пикапи.