На пленарната седница на Европскиот парламент денеска беше отфрлена политиката која вклучува натпревари спротивни на принципите на слободно натпреварување и спортски заслуги, како што е Суперлигата. Извештајот за резолуцијата, кој беше против новото европско натпреварување, доби 597 гласови за, 36 против и 55 воздржани. Конкретно, членот 13 од извештајот се залага за „европски модел на спорт кој ја препознава потребата за цврста посветеност на интеграцијата на принципите на солидарност, одржливост, вклученост, отворено натпреварување, спортски заслуги и правичност“.
Европскиот парламент се противи и на сите „сецесионистички натпревари кои ги поткопуваат овие принципи и ја загрозуваат стабилноста на спортскиот екосистем воопшто“. Дополнително, беше истакнато дека сите актери во спортот и националните власти треба да ги промовираат овие принципи.
Потпретседателот на Спортската група на Европскиот парламент, Томаш Франковски, ја истакна важноста на европскиот модел на спорт и ги повика европските институции и националните влади да продолжат да се спротивставуваат на овие иницијативи. И Европскиот парламент се спротивстави на предлогот Светското првенство да се одржува на секои две години.
Извештајот на Парламентот го поддржа документот издаден од Комитетот за култура и образование на Европскиот парламент, во кој се изразува спротивставување на затворените натпревари како што е Суперлигата, бидејќи тоа претставува закана за стабилноста на спортскиот екосистем.
Франковски потсети на важноста на здравјето на спортистите, изразувајќи лично противење на претходно предложениот календар на натпревари како што е Светското првенство на секои две години.
УЕФА издаде соопштение во кое ја поздрави резолуцијата „како важен чекор во развојот на европски модел на спорт заснован на вредности, солидарност и спортски заслуги“.
„Парламентот на ЕУ е недвосмислен во ставот на главната политичка институција на ЕУ за актуелните закани со кои се соочува европскиот спорт“, се вели во соопштението на УЕФА.
Реал, Барселона и Јувентус, единственото трио што остана да ја брани Суперлигата, одговорија со соопштение во кое целосно ги поддржуваат вредностите искажани во извештајот. Тие исто така наведуваат дека Суперлигата никогаш не била замислена како „нарушувачко“ натпреварување и дека има потреба да се гарантира дека сите актери кои учествуваат во спортскиот сектор на Европската унија ги почитуваат нејзините основни вредности и правната рамка од која работи УЕФА, која функционира на основа на монопол.
Во секој случај, очигледно е дека војната меѓу двете страни се уште не е завршена …