Toyota и Lexus претставија 15 концептуални автомобили кои ќе добијат сериски верзии, што е половина од гамата на електрични автомобили што овие две јапонски компании ќе ги претстават до 2030 година. Меѓу претставените концепти се седани, теренци, комерцијални возила и суперавтомобил инспириран од легендарниот Lexus LFA.
Многумина се запрашаа зошто Toyota доцни со лансирањето на електричните модели, бидејќи повеќето производители на автомобили веќе навлегоа длабоко на ова поле, а јапонската компанија сега одговори со промоција на 15 одеднаш. Претседателот на Toyota, Акио Тојода, за време на презентацијата ги објави и плановите за електрификација на Toyota и Lexus, а двете компании ќе лансираат дури 30 електрични возила до 2030 година.
Помеѓу претставените 15 модели е и првата електрична Toyota, моделот bZ4X, кој прв ја виде светлината на денот, а има и многу други возила од различни сегменти. Стратегијата на Toyota и Lexus предвидува продажба на 3,5 милиони електрични автомобили до 2030 година за да се намалат емисиите што е можно поскоро, а двете марки ќе разгледаат други опции за јаглерод неутрални возила и кои користат чиста енергија.
По моделот bZ4X, сериската верзија ќе добие и урбан кросовер инспириран од моделот Aygo-X, кој ќе биде дизајниран за јапонскиот и европскиот пазар, потоа седан со средна големина, но и чистокрвен теренец.
Овие ќе бидат модели од масовно производство по разумна цена, но 11-те други претставени модели ја откриваат различноста на понудите на Toyota и Lexus во иднина, бидејќи тие вклучуваат помали комерцијални возила, класични теренци, пикап камиони, па дури и два суперавтомобили.
Според Тојода, некои идни електрични автомобили ќе се засноваат на постоечки модели како што се Toyota Hilux и Lexus NX, но други ќе бидат сосема нови и ќе бидат поставени на нова платформа e-TNGA EV создадена во соработка со Subaru.
Повеќе детали не се објавени, но познато е дека првиот електричен Lexus ќе дебитира следната година, а ќе сподели многу со моделите Toyota bZ4X и Subaru Solterra.