Организацијата на Обединетите нации за образование, наука и култура (УНЕСКО) на листата на нематеријално културно наследство вклучи традиционална супа од Хаити, која се смета за симбол на независноста на државата.
Супата Џуму (Joumou soup) е „многу повеќе од обичен оброк“, рече Одре Азуле, генерален директор на УНЕСКО.
„Таа ја раскажува приказната за хероите и хероините од независноста на Хаити, нивната борба за човекови права и нивната тешко стекната слобода“, рече таа.
Супата на база на тиква стана симбол на работи кои долго време им беа забранети на робовите додека Хаити беше француска колонија, сè додека не стекна независност на 1 јануари 1804 година, како прва држава создадена од бунтовни црни робови.
Својата слобода ја прославија со конечно конзумирање супа, а Хаиќаните традиционално ја служат на Нова година во спомен на годишнината од ослободувањето од ропството.
Списокот на нематеријално наследство има за цел да ја подобри видливоста на традициите и знаењето на заедниците ширум светот – од арапска калиграфија до италијански лов на тартуфи.