Некои од најголемите телекомуникациски оператори во Соединетите држави се согласија со барањето на владата да го одложат лансирањето на 5G услугите оваа недела. AT&T и Verizon првично го одбија барањето, но подоцна се согласија да го одложат лансирањето на нивните нови мрежи од петтата генерација.
Американскиот секретар за транспорт Пит Бутигиг и Федералната управа за авијација (FAA) го поднесоа барањето поради загриженоста за безбедноста на воздухопловството, потсетува Би-Би-Си. Ова се случи откако производителите на авиони предупредија дека безжичните 5G сигнали може да пречат на чувствителната електроника на авионот и да доведат до прекини на летовите.
Како компромис, телекомите предложија одложување на лансирањето на 5G услугите околу американските аеродроми за шест месеци како привремена претпазливост. Пристапот е сличен на оној веќе усвоен во Франција.
Минатиот месец, шефовите на двата најголеми светски производители на авиони, Airbus и Boeing, рекоа дека „пречењето на 5G може негативно да влијае на способноста на авионот да работи безбедно“. Особено, 5G сигналите може да ја нарушат работата на висиномерите на авионите.
Двата телекоми рекоа дека го прифатиле предложеното двонеделно одложување доцна во понеделникот. „Свесни сме дека безбедноста на воздухопловството и 5G можат да коегзистираат – и уверени сме дека понатамошната соработка и техничката евалуација ќе ги ублажат сите проблеми“, рече портпаролот на AT&T.
FAA, од своја страна, им се заблагодари на телекомите што го одложија лансирањето на нивните 5G мрежи.