Чешката сноубордерка Естер Ледецка лесно го освои златниот медал во паралелен велеслалом на Зимските олимписки игри во Пекинг. На овој начин таа ја задржа титулата од пред четири години.
Естер Ледецка е првата спортистка која освоила олимписко злато во два спорта на исти Зимски игри во Пјонгчанг 2018 година. Во финалето, таа ја победи Австријката Даниела Улбинг, а Глорија Котник освои изненадувачка бронза откако никогаш не стигнала до подиумот на натпревар од Светскиот куп.
Естер Ледецка има 26 години, но веќе е дел од историјата на Олимписките игри. Таа е трикратна олимписка шампионка – има освоено два златни медали во сноуборд во паралелен велеслалом (2018, 2022) и еден во алпско скијање во супервелеслалом (2018).
По денешниот триумф во сноуборд, таа повторно ќе го сврти вниманието кон алпското скијање, каде ќе ја брани титулата, но ќе учествува и во спуст.