Генералниот секретар на НАТО Јенс Столтенберг вечерва ја осуди одлуката на Русија да ги признае регионите Народна Република Доњецк (ДНР) и Народна Република Луганск (ЛНР) за независни држави.
Столтенберг ја осуди одлуката на Русија да ја признае независноста на, како што рече, „бунтовничките региони на Украина“.
Откако синоќа рускиот претседател Владимир Путин потпиша указ за признавање на ДНР и ЛНР, Столтенберг ја обвини Москва дека продолжува да го поттикнува конфликтот во источна Украина.
Столтенберг оцени дека Москва се обидува да најде изговор дека „уште еднаш ја нападна Украина“.
„Москва продолжува да го поттикнува конфликтот во источна Украина обезбедувајќи финансиска и воена поддршка на сепаратистите. Таа, исто така, се обидува да создаде изговор за повторна инвазија на Украина“, рече Столтенберг.
Генералниот секретар на НАТО оцени дека ваквиот потег на Москва дополнително го поткопува суверенитетот и територијалниот интегритет на Украина, ги крши Минските договори и ги нарушува напорите насочени кон решавање на конфликтот.
Во писмената изјава, генералниот секретар на Алијансата потсети дека Советот за безбедност на ОН, чиј член е Русија, во 2015 година го потврди целосното почитување на суверенитетот, независноста и територијалниот интегритет на Украина, додавајќи дека „Доњецк и Луганск се дел од Украина“.
Тој нагласува дека НАТО го поддржува суверенитетот и територијалниот интегритет на Украина во нејзините меѓународно признати граници.
„Сојузниците ја повикуваат Русија, со најсилни можни зборови, да го избере патот на дипломатијата и веднаш да ја смени својата масовна акумулација на војници во и околу Украина и да ги повлече своите сили од Украина во согласност со нејзините меѓународни обврски“, заклучи Столтенберг.