Тренерот на Виљареал, Унаи Емери го пофали својот тим по ремито 1-1 со Јувентус на домашен терен во првиот 1/8-финален дуел од Лигата на шампионите. Гостите од Италија отворија со ран гол на Душан Влаховиќ, а во 66-тата, Дани Парехо го врати резултатот.
„Не се плашевме и покажавме дека сме зрела екипа. Можевме да израмниме во првото полувреме, но во второто стигнавме до заслужен резултат. Главната работа е што покажавме зрелост. Примивме гол, но се вративме во мечот и до крајот бркавме победа. Одиме во Торино да го завршиме започнатото“, вели тренерот.
Тој го пофали српскиот напаѓач на „старата дама“.
„Влаховиќ е играчот кој ја прави разликата. Тој постигна гол во првата минута и можеше да постигне уште неколку. Тешко е да го држите цел натпревар, но успеавме да го изолираме од играта, како и Алваро Мората“, изјави Емери.