Во средата, словенечкиот и полскиот премиер Јанез Јанша и Матеуш Моравјецки испратија писмо до претседателот на Европскиот совет, Шарл Мишел, барајќи на Украина брзо да и се додели кандидатски статус и да понуди амбициозен план за членство во ЕУ до 2030 година, под услов да ги исполни потребните услови.
„Треба да направиме амбициозен и опиплив план за брза интеграција на Украина во ЕУ до 2030 година. Планот мора да биде прецизен, со јасно дефинирани чекори, рокови и гаранции за членство до 2030 година, под услов да се исполнат потребните услови“, се вели во заедничкото писмо на двајцата премиери.
Првата фаза од планот ќе биде одлука веднаш да се признае европската перспектива на Украина и да и се додели кандидатски статус по аплицирањето за членство.
Во писмото се додава дека сличен план треба да се направи и за Грузија и Молдавија, како и за сите партнери од Западен Балкан, кои веќе имаат европска перспектива.
Јанша и Моравјецки истакнуваат дека Русија ги прекршила сите свои обврски од Меморандумот од Будимпешта од 1994 година, со кој Украина се согласи на нуклеарно разоружување во замена за безбедност во рамките на нејзините меѓународно признати граници, го анектираше Крим во 2014 година и сега ја признава независноста на одметничките територии во источна Украина.
„Сите потези, активности и одлуки на Кремљ претставуваат директна и непосредна закана не само за Украина, туку и за мирот и стабилноста во Европа. На таа закана треба да и се спротивстави силен и обединет одговор, вклучително и итни санкции“, се додава во писмото.
Процесот на пристапување на Украина во Европската унија треба да биде поддржан со големи финансиски средства, а од помош ќе биде и богатото искуство на ЕУ по неколку бранови на проширување, посочуваат двајцата премиери.
Тие велат дека тоа ќе му даде на украинскиот народ стратешка надеж и мотив да истрае во одбраната на својата татковина, суверенитет и демократија и дека реалните изгледи за членство ќе помогнат да се фокусираат на реформите потребни за членство.
„Ова ќе помогне да се запре демографскиот пад и бегството на капитал од Украина и да се направи привлечна за странски инвестиции и да се олесни нејзиниот економски и социјален развој“, се вели во писмото.
Тие додаваат дека членството на Украина во Европската унија на никаков начин нема да биде насочено против Русија и нејзините интереси.
„Време е за брзи и храбри одлуки. Историската лекција што треба да се научи во последните две децении вели дека ако ЕУ не се прошири, ќе се прошири некој друг. Сега ја плаќаме цената за игнорирањето на таа лекција. Да извлечеме поуки бидејќи цената на игнорирањето во иднина само ќе се зголемува“, велат Јанша и Моравјецки.