Портпаролот на Кремљ Дмитриј Песков синоќа ја отфрли забелешката на американскиот претседател Џозеф Бајден дека Владимир Путин „не може да остане на власт“, велејќи дека Русите бираат кој ќе биде нивен лидер.
Запрашан да ја коментира изјавата на Бајден, Песков изјави за Ројтерс: „Не е на Бајден да одлучува. Претседателот на Русија го избираат Русите“.
Американскиот претседател Џо Бајден не повика на промена на режимот во Русија кога рече дека претседателот на таа земја не може да остане на власт, вели претставникот на Белата куќа.
„Претседателот сметаше дека не треба да му се дозволи на Путин да има моќ над своите соседи или регионот. Тој не зборуваше за владеењето на Путин во Русија или за промената на режимот“, рече претставникот.
Светските медиуми вчера ја пренесоа изјавата на Бајден за време на говорот во Варшава дека рускиот претседател Владимир Путин не може да остане на власт.
„Поради Бога, овој човек не може да остане на власт“, рече тој.