Грција официјално ги укинува Ковид-потврдите како услов за влез во земјата од 1 мај, беше соопштено по седницата на Комисијата на експерти на тамошното Министерство за здравство што попладнево.
Комисијата на експерти на Министерството за здравство на денешната седница едногласно препорачала:
-Суспендирање на потврдите за КОВИД од 1 мај како услов за влез во угостителските и малопродажните објекти и враќање на нивните капацитети на 100 проценти исполнетост.
-Суспендирање на Дигиталниот европски Ковид Сертификат (EUDCC) како услов за влез во државата.
-еден брз тест неделно (од два досега) за невакцинирани работници, со исклучок на болниците.
-еден брз тест (два досега) за невакцинираните наставници.
Владата го прифати предлогот на Комисијата.
Претходно, на трибината во Делфи, министерот за здравство Танос Плеврис рече дека кога ќе заврши летото, мерката ќе се врати на сила, па укинувањето на сертификатот ќе трае само додека е убаво времето.
– Не ја игнорираме пандемијата, туку влегуваме во нова реалност со укинувањето на рестрикциите. Сепак, наесен ќе бидеме подготвени за вакцинација и зајакнување на јавното здравје, подвлече тој.