Заменик генералниот секретар на ОН за хуманитарни прашања Мартин Грифитс најави почеток на уште една евакуација на цивили од Мариупол и „Азовстал“.
„Денеска ја започнавме третата операција со цел дополнителна евакуација на цивили од Мариупол и „Азовстал“. Нема да зборувам повеќе за тоа додека операцијата не заврши“, рече Грифитс на состанокот на Советот за безбедност на ОН.
Претходно руските вооружени сили најавија дека на 5, 6 и 7 мај ќе отворат хуманитарен коридор за евакуација на цивили од територијата на металуршкиот комбинат Азовстал во Мариупол.
Генералниот секретар на Обединетите нации, Антонио Гутереш денеска соопшти дека во тек е третата евакуација на цивили од украинскиот пристанишен град Мариупол и од опколената челичарница Азовстал.
Обединетите нации и Меѓународниот комитет на Црвениот крст (МКЦК) им помогнаа на речиси 500 цивили да ја напуштат областа во текот на изминатата недела.