Поголемиот дел од Шангај го запре ширењето на коронавирусот во заедницата, а помалку од еден милион луѓе остануваат под строги мерки за изолација, соопштија властите во понеделникот додека градот се движи кон повторно отворање, при што економските податоци го покажуваат негативното влијание на кинеската „нулта-ковид“ политика.
Заменик-градоначалникот Зонг Минг изјави дека 15 од 16 области на Шангај го запреле преносот на вирусот меѓу оние кои не се во карантин, пренесува „Асошиејтед прес“.
„Епидемијата во нашиот град е под контрола. Мерките за превенција се сè поуспешни“, рече Зонг на конференцијата.
На супермаркетите, трговските центри и рестораните им е дозволено повторно да се отворат во понеделник со ограничувања на бројот на луѓе и бесконтактни трансакции. Сепак, сообраќајните ограничувања остануваат на сила, а железничкиот сообраќај засега останува затворен.
Иако бројот на случаи опаѓа, градските и националните власти испратија различни пораки за состојбата на епидемијата во Шангај и кога животот може да се врати во нормала во градот со 25 милиони жители, каде што многу жители се затворени во своите домови и населби повеќе од 50 дена.
Се предвидува дека од први јуни Шангај ќе се врати во нормала.