Рускиот претседател Владимир Путин денеска во разговор со австрискиот канцелар Карл Нехамер изјави дека Украина треба да ги отстрани мините од областа во близина на нејзините пристаништа за да овозможи безбедна испорака на храна, соопшти Кремљ.
Во соопштението се наведува дека Путин и Нехамер имале детална размена на мислења за прашањата за безбедноста на храната и дека Путин ги отфрлил тврдењата на Западот дека руската акција ја влошила глобалната криза со храна.
Кремљ истакна дека Путин нагласил дека обидите да се обвини Русија за тешкотиите во испораката на земјоделските производи на светските пазари се неосновани, пренесува ТАСС.
Рускиот лидер даде детално објаснување за вистинските корени на тие проблеми што се појавија, особено поради санкциите на САД и ЕУ против Русија.
САД и другите западни сојузници го отфрлија барањето на Русија за укинување на санкциите и ја обвинија Москва за блокирање на испораката на жито од Украина на светските пазари, што Кремљ го негираше.