Руската гасна компанија „Газпром“ во четвртокот рано наутро почна да го намалува количеството на гас што го испорачува за Германија преку гасоводот „Северен тек 1“ на дневна максимална количина од 67 милиони кубни метри.
Намалувањето на снабдувањето со гас дојде откако компанијата најави дека ќе го намали максималниот износ на испорачаниот гас од 167 милиони кубни метри дневно на 100 милиони кубни метри.
Со последното намалување, компанијата за два дена ја намали количината на гас во Германија за околу 60 отсто, а „Северен тек 1“ е главниот гасовод што доставува руски гас во таа земја.
Германскиот министер за економија Роберт Хабек ја обвини Русија дека се обидува да создаде непријатност и прави потег за зголемување на цените на гасот, но додаде дека Германија сè уште може да се снабдува со гас на алтернативен начин, иако по повисока цена. Германските складишта за гас во моментов се исполнети со 56 проценти.
Руски „Газпром“, кој е во мнозинска државна сопственост, рече дека прекините во снабдувањето со гас биле предизвикани од поправки на единицата за компресија на гас, иако тврдењето беше оспорено од германската федерална агенција.
Русија ја прекина испораката на гас за неколку европски земји во последните неколку недели поради несогласувањата со санкциите што и беа наметнати како резултат на нејзината инвазија на Украина и затоа што европските земји одбија да платат за гас во рубљи, што Русија го бараше за да ја поддржи својата валута.
Цените на енергијата значително пораснаа поради намалените испораки на гас од Русија за Европа, а многу енергетски аналитичари стравуваат дека Русија би можела да ги затвори вентилите кон Европа за да изврши притисок врз неа.