Францускиот документ предложен од претседателот Емануел Макрон е всушност протоколот од втората седница на Мешовитата меѓувладина комисија, формиран врз основа на член 12 од Договорот за пријателство, добрососедство и соработка меѓу Република Бугарија и Република Северна Македонија, одржана во почетокот на јуни оваа година, објави попладнево бугарската новинска агенција „БГНЕС“.
Според агенцијата, документот го оценува она што двете влади го направиле досега и ги поставува насоките за понатамошни обврски и активности. Во делот што ги отсликува достигнувањата, впечатлива е незадоволителната оценка за работата на Заедничката историска комисија, при што се споменува експлицитниот, но мал напредок постигнат во однос на цар Самуил и богомилството.
-Во документот се предвидува историските личности за кои Заедничката историска комисија веќе постигнала компромис да бидат објавени и прифатени за општи прослави со приложен календар за 2022 и 2023 година. За последните четири години од својата работа, предметната комисија најде договор за Св. Свети Кирил и Методиј, Св. Климент Охридски, Св. Наум Охридски и Цар Самуил. Од нив, во записникот експлицитно е споменат само цар Самоил, а предвидено е да се заменат натписите на неговите споменици во РСМ и конкретно на тврдината во Охрид, согласно формулата договорена од Мешовитата историска комисија. Предвидена е и непосредна измена на часот посветен на Цар Самуил во наставната програма за VII одделение на македонските училишта, согласно постигнатата компромисна формула, објави меѓу другото БГНЕС.
Агенцијата наведува дека во текстот на протоколот не се вклучени историските теми „Гоце Делчев“, „Илинденско востание“ и „ВМРО“ експлицитно спомнати во Рамковниот став, кои се спорни теми меѓу двете национални историографии.