Седумдесет руски дипломати и нивните семејства вчера ја напуштија Бугарија откако беа протерани од земјата на Европската унија поради сомневање за шпионирање. Бугарското Министерство за надворешни работи во вторникот соопшти дека побарало од Русија да ги повлече своите 70 дипломати до недела, 3 јули, со цел да го намали персоналот на нејзината амбасада во Софија слично на бугарската во Москва.
„Првата причина е реципроцитет. Второ, активностите на руските функционери кои одговорните бугарски власти ги прогласија за некомпатибилни со Виенската конвенција за дипломатски односи“, соопшти тогаш бугарското Министерство. Како одговор, Русија се закани дека целосно ќе ја затвори својата амбасада во Бугарија, што ќе ја направи првата членка на ЕУ на која ѝ се случило такво нешто.
70 Russian diplomat/spies being expelled from Bulgaria https://t.co/Zlzq5WVMr9
— Eileen Clancy (@clancynewyork) July 3, 2022
Бугарскиот премиер Кирил Петков ја обвини руската амбасадорка во Софија, Елеонора Митрофанова дека стои зад неодамнешното гласање недоверба на неговата влада, а дел од западните медиуми сметаат дека Бугарија може да стане слаба точка на руското влијание во Европската унија.
Вршителот на должноста бугарски премиер зазеде цврст став против руската агресија врз Украина. Во февруари тој го отпушти својот министер за одбрана затоа што одби да го нарече војна она што Русија го нарекува „специјална воена операција“. Петков ги поддржа европските санкции против Москва и се согласи да ја поправи украинската воена опрема, иако не сакаше да испрати оружје директно во Киев.