Украинските војници кои се вратија од фронтот на истокот на земјата ги опишаа условите што владееле во битките за големите градови во Луганск, особено Северодоњецк, кој Русите неодамна целосно го окупираа.
„Запалени шуми и градови изгореа до темел. Војници со отсечени екстремитети. Бомбардирања кои се толку немилосрдни што единствената опција е да лежите во ров, да чекате и да се молите“.
Украинските војници кои се вратија од линијата на фронтот во Донбас во источна Украина – каде што Русија води жестока офанзива – опишаа колку „апокалиптично“ изгледаше војната на исцрпување.
Во интервјуа за „Асошиејтед прес“, некои се пожалија на хаотична организација, дезертери и проблеми со менталното здравје предизвикани од немилосрдното гранатирање. Други зборуваа за високиот морал, херојството на нивните другари и посветеноста да се борат, дури и кога подобро опремените Руси контролираа голем дел од борбената зона.
Поручникот Володимир Назаренко (30), вториот по команда на баталјонот Свобода на украинската национална гарда, беше со војниците на кои им беше наредено да се повлечат од Северодоњецк.
„Бевме гранатирани секој ден. Не сакам да лажам за тоа. Но, тоа беше бараж муниција на секоја зграда“, рече Назаренко. „Градот беше методично срамнет со земја“.
Во тоа време, Северодоњецк беше еден од двата големи градови под контрола на Украина во Луганск, каде што проруските сепаратисти прогласија непризнаена република пред осум години. До моментот кога дојде наредбата за повлекување на 24 јуни, Украинците беа опколени од три страни и го бранеа градот од хемиската фабрика во која се засолнуваа и цивили.
„Ако имало пекол некаде на Земјата, тогаш тоа е во Северодоњецк“, вели Артем Рубан, војник од баталјонот на Назаренко. „Внатрешната сила на нашите момци им овозможи да го држат градот до последен момент“.
„Тоа не беа човечки услови во кои се бореа. Тешко е да се објасни како се чувствуваат сега или како беше таму“, рече Рубан. „Тие се бореа до крај. Задачата беше да се уништи непријателот, без разлика на се“.
Назаренко, кој исто така се бореше во Киев и на други места на исток откако Русија ја нападна Украина, ја смета операцијата на Украина во Северодоњецк за „победа“ и покрај исходот. Тој рече дека бранителите успеале да ги ограничат жртвите додека го одложиле рускиот напредок многу подолго од очекуваното, исцрпувајќи ги руските ресурси.
„Нивната армија претрпе огромни загуби, а нивниот потенцијал за напад е избришан“, тврди тој.