Зеленски: Украина ќе ѝ помогне на ЕУ да се спротивстави на рускиот енергетски притисок

од Stefanija Kuzmanovska
213 прегледи

Украина се подготвува да го зголеми извозот на електрична енергија во Европската унија (ЕУ) за да ѝ помогне „да се спротивстави на енергетскиот притисок“ од Русија, изјави синоќа украинскиот претседател Владимир Зеленски.

„Ќе го зголемиме извозот на струја за потрошувачите во ЕУ“, рече Зеленски, пренесува „Бета-Франс прес“.

Неговата изјава доаѓа еден ден откако земјите-членки на ЕУ се договорија координирано да ја намалат потрошувачката на гас и на тој начин да ѝ помогнат на Германија по драстичното намалување на руските испораки.

Украина и ЕУ ја обвинуваат Москва дека го користи гасот како економско и политичко оружје.

„И покрај војната, во рекордно време обезбедивме интеграција на украинските мрежи во европскиот систем. Нашиот извоз ни овозможува не само да ја зголемиме девизната заработка, туку и да им помогнеме на нашите партнери да се спротивстават на рускиот енергетски притисок. Постепено ќе ја направиме Украина земја која ја гарантира енергетската безбедност на Европа“, рече Зеленски.

Слични содржини